【明報專訊】下個月復活節，香港賽馬會連續第五年舉行「同心同步同樂日」，活動4月19至21日喺沙田馬場同彭福公園舉行，主題為「同樂齊學 跨代共融」，希望透過活動連結社區。會場內十大活動區有超過70項寓教育於娛樂嘅活動同遊戲，包括同馬近距離接觸、學習馬嘅護理小知識、DIY復活節手工藝品等。同樂日仲設STEAM(科學、科技、工程、藝術及數學)工作坊，畀小朋友可以創科原理做小製作或玩遊戲。 今年會延續往年挑戰世界紀錄嘅重點活動，馬會邀請咗約千名中小學同非政府機構伙伴嘅參加者，喺本地著名摺紙藝術家陳柏熹帶領下，合力挑戰「最大規模的摺紙課」世界紀錄。同樂日亦會舉行青少年足球活動，仲邀請咗特別嘉賓、曼聯名宿安迪高爾(Andy Cole)與眾同樂，參加者亦有機會跟隨曼聯足球學校嘅教練學習小型足球。 千人學摺紙 挑戰世界紀錄 門票3月25日(周一)起發售，市民可於當日上晝10點起登入Ticketflap (www.ticketflap.com/zh/rht)電子售票網買飛。普通門票和長者門票每套分別為60元和40元。
|
| |
| |
;){kind=small}
;)
