【明報專訊】美心集團創辦人伍沾德嘅長女伍淑清(圖)多次發表撐警言論同批評示威者，又話會「放棄」一啲被社交媒體洗腦嘅年輕人，其言論搞到美心集團被示威者針對，旗下餐廳不斷被破壞及杯葛。另一邊廂，伍淑清成為內地名人，中央電視台最近舉行「感動中國2019年度人物評選」，伍淑清係香港唯一候選人，截至昨午5點獲得逾40萬票支持，全國排第二。 「感動中國2019年度人物評選」有21個候選人，目前排首位嘅係「四川森林消防員」，獲得逾100萬票支持。今年3月四川涼山木里縣發生森林火災，就係靠呢班消防員滅火。伍淑清目前得票排第二，央視形容佢「一家人愛國愛港」，話自反修例風波發生以來，因為嚴辭阻止亂港分子發起嘅學生罷課，「成為亂港分子的眼中釘、肉中刺」；亦提到佢曾經現身瑞士日內瓦聯合國人權理事會例會，向世界說出「真實的香港」。 投票明年1月31日截止，央視講明一個IP地址，每日可以投10票。咁嘅投票方式，唔知伍淑清最終會否獲得過億票，實現獲得14億中國人民支持呢？
|
| |
| |
;){kind=small}
;)
