【明報專訊】唔少人都鍾意喺遊行示威扮成各種角色，噚日民陣遊行期間，突然出現咗多隻「Pepe」、「連豬」，都係近月抗爭較具代表性嘅角色，原來係網台「城寨」嘅團隊出品，由多個義工喺工廈天台通宵達旦製作，最終製作出108個「好漢」。 有Pepe食生命麵包中藍水 噚日遊行出現多個戴卡通角色頭套嘅示威者，包括個口塞住條生命麵包嘅Pepe、美國總統特朗普版嘅Pepe，同埋畀水炮車藍水射中嘅Pepe，加埋一堆「連豬」，相當壯觀。 根據城寨facebook上載嘅圖片、影片，呢班「好漢」集合高舉「五大訴求，缺一不可」手勢後，齊齊搭港鐵去遊行，引嚟乘客爭相影相，片段可見乘客都笑笑口，似乎冇畀佢哋嚇親。 城寨節目主持人、時事評論員劉細良喺fb上載自己戴上黑色Pepe頭套嘅相，話過去一星期瞓得好少，每日都喺工廈天台同一班義工倒模、打磨、上色，唔少義工由朝到晚幫手，唔單止自攜氣泵同打磨工具，甚至通宵趕工，結果一星期內就完成目標，「這不是一場時代革命，還是什麼？」
|
| |
| |
;){kind=small}
;)
