【明報專訊】立法會財委會原定今日繼續審議公務員加薪撥款項目，不過喺武漢肺炎疫情肆虐下，財委會主席陳健波(波哥)噚日決定應民主派議員要求，取消財委會會議。不過波哥都講明，為咗解決積壓項目，除咗3至5月將加會28小時，6、7月都可能加會14小時。 陳健波加會處理積壓撥款申請 民主派22名議員前日去信財會主席陳健波，要求基於防疫、抗疫從嚴原則，請佢取消今日非緊急嘅財委會會議。波哥噚日回覆，話作出呢個決定非常艱難，亦要考慮好多因素，佢話有專家前日表示呢14日係抗疫關鍵期，市民應該盡量留家，詢問其他議員後考慮各項因素，認為市民健康、抗疫最重要，決定取消今日嘅財委會會議。 波哥又提到，公務員加薪審咗20幾個鐘都未表決，現時財委會積壓約50項撥款申請，涉款逾千億。佢呼籲財委會復會後，議員能夠放下成見、聚焦認真審核議案，又要求官員利用呢段時間做好準備，更到位、精闢解答議題問題，加快審議工作。
|
| |
| |
;)
