【明報專訊】政務司長張建宗噚日出席立法會大會繼續回應有關「平息民憤」嘅急切質詢，答應咗民建聯梁志祥會認真考慮同一班司局長幫手清理堵路，仲話「希望60個議員一齊做」。唔知司長係數漏咗，定唔記得咗立法會𠵱家係有69個議員喇。不過，政府話考慮就唔係人人受落，噚日下晝立法會傾休會待續議案時，政府只係派副保安局長出席，經民聯石禮謙即揶揄，咁重要嘅議案司長唔出席，「係咪喺中環執緊石仔？」張建宗之後現身立法會大會。 稱禮賓府會議無特別 張建宗澄清無飲糖水 另一個議員關心嘅係前晚一班問責官員去禮賓府討論咗咩措施，點知張建宗話會議無咩特別意義。搞到工聯會麥美娟扯晒火鬧佢「我唔理你噚日(前日)去食糖水定係吹水」，佢係想問張建宗會否統領跨部門做「全城止暴大行動」；資訊科技界莫乃光發言時亦批評「你哋(問責官員)噚晚又同佢(林鄭月娥)食糖水，講咗咩又唔肯講」。張建宗好認真咁答：「我想同你澄清，噚晚我哋無糖水飲過。」 呢兩日大會，建制派同泛民都批評張建宗無具體措施講到，人民力量陳志全就問張「夠唔夠膽落去中環同市民講止暴制亂、止暴制亂」，批評佢講到好似念咒咁。麥美娟係葵青區偉盈區候選人，對手係冼豪輝。
|
| |
| |
;){kind=small}
;)
