【明報專訊】前天文台長林超英噚日發表網誌提到，過去一個多星期，唔少朋友都話天氣愈來愈凍，但與天文台實際量度到嘅氣溫不符，其實係屋企牆壁作怪。另外，佢又分享冬天節能貼士，即使嚴冬都可以節能慳電費。 林超英回顧過去個多星期嘅氣溫，最凍係上星期四(2月1日)，天文台錄得全日最低只有6.8℃，之後幾日氣溫其實稍為上升，無理由覺得愈來愈凍。佢話其實關鍵在於家裏溫度嘅變化，同室外溫度趨勢並唔同步。當室外氣溫驟降時，室內嘅牆壁仲保持溫暖，所以大家返到屋企會感受到暖牆輻射出來嘅紅外線，即係「家庭溫暖」。 不過由於低溫持續幾天，牆壁餘熱逐漸消耗，牆壁溫度愈來愈接近室外氣溫，所以喺家中逗留嘅時候，愈嚟愈感到寒氣逼人，解釋咗點解近日氣溫回升但感覺愈來愈凍。 電氈比暖爐慳電得多 林超英又話，呢幾日喺屋企愈坐愈凍，應付方法係多穿衣服及多運動，以天然方式製熱，晚上瞓覺唔用暖爐，因為耗電量高達1000至2000瓦特，用電氈製造溫暖被窩，耗電量只有60瓦特，半夜之後甚至會太熱而關掉，跟住瞓到天光。
|
| |
| |
