港鐵救貓慢駛一粒鐘
網民話有進步
[2014.09.01] 發表
【明報專訊】港鐵東鐵線直通車早前輾死唐狗「未雪」悲劇，令不少市民感到憤怒，亦令港鐵「學乖」咗。噚日下晝東鐵線路軌範圍內，有乘客又發現有動物，今次係隻貓仔，港鐵無再「視而不見」，列車慢駛咗近成粒鐘，畀隻貓仔離開路軌範圍。
通知車長留意路軌
港鐵同Emily證實，噚日下晝6點05分，有乘客向大圍站職員話，佢由沙田站坐東鐵線前往大圍途中，喺車廂望出去時，好似見到有隻貓仔喺路軌隔籬啲草叢度出沒，為咗審慎起見，車務控制中心即時安排職員落路軌巡查，其間列車要慢駛，港鐵亦通知車長要留意路軌情况，來往大圍至沙田嘅一段車程，比平日要行多5分鐘。
小貓最後離開路軌
最後職員喺沙田站附近距離路軌大約10米範圍嘅草叢，見到有隻貓仔，隻貓仔見到職員後立即走出草叢圍欄外，離開咗路軌範圍；列車服務受影響約50分鐘，至約6時55分陸續恢復正常，其間港鐵亦廣播通知乘客。
有網民留言話，港鐵今次處理手法有進步，但亦有網民認為，如果港鐵一早肯咁做，唐狗「未雪」就唔使枉死。Emily就希望港鐵可以繼續尊重生命，同埋諗方法避免動物闖入路軌範圍。
更多港聞
相關新聞
