【明報專訊】近日流感高峰期，公立醫院前線醫護人員工作量大增，食衛局長陳肇始早前形容公院醫護人員節日返工係「捱義氣」，引起護士不滿。醫學界立法會議員陳沛然(Pierre)改咗流行曲《終身美麗》歌詞諷刺政府，當中批評陳肇始「叫捱義氣才是虛偽」、「義氣未能被愛慕」。 Pierre噚日喺個人facebook上載咗《終身美麗》嘅改詞，仲話改詞人係「陳配鹽」，佢將「愛有千斤重」改做「工作千斤重」、「從前那一位，永未能做到」改做「急症多一位，病牀未找到」。唔少歌詞仲諷刺陳肇始，如「是護士喚醒我，義氣未能被愛慕」、「入職可終生美麗，陳局長勾勾手指發誓，落區前線排隊敬禮，叫捱義氣才是虛偽」、「高官自信，穩固地位」。 醫管局早前邀請楊千嬅等藝人拍片，為醫護打氣，但效果不似預期，醫生組織「杏林覺醒」就話除咗「哦」之外唔知講乜好。有人就喺陳沛然嘅改詞post下面留言「叫班明星唱啦」。Emily睇過歌詞，覺得Pierre改詞好多都唔啱音，不過誠意搭夠。
|
| |
| |
;)
