【明報專訊】蛇年好快過去，噚日facebook熱傳一張相，係《袁御庫2013蛇年通勝》嘅封面，原來袁師傅上年好多驚人預測，包括中國大陸統一台灣、政務司長林鄭月娥辭職、第三次世界大戰爆發，仲有中日開戰。不過，一樣都冇發生，袁師傅同Emily解釋，話封面標題只係用嚟吸引人喎，叫大家細閱內文先至批評，仲送咗本大作畀Emily𠻹。 講幾樣完全無發生 袁師傅話自己係推背圖作者、唐朝國師袁天罡嘅傳人，十二三歲已經跟爺爺學師，之後拜咗多位名師。網友質疑佢嘅預測無個中，袁師傅話，中國大陸統一台灣呢，係指國家主席習近平上任後8年內可以統一兩岸，無講實係2013年咁話。Emily睇番佢本書，又真係咁寫喎。 咁又話林鄭落台？袁師傅話，今年林鄭嘅政治助理張秀麗辭職都計數。不過，佢本書用林鄭嘅八字做預測，原來老闆嘅八字可以批埋下屬幾時轉工？至於「第三次世界大戰爆發」，佢就話「世界大戰」唔係出動火箭導彈嗰隻，係網絡大戰。佢解釋，斯諾登揭發美國竊聽各國網絡通訊，就已經係「網絡戰爭」啦，仲話嚟緊2014年會繼續「大戰」，各國互相入侵電腦偷機密資料同虛擬財產，仲特別提醒市民小心被人偷Bitcoin𠻹！ 叫CY小心七一遊行 2012年袁師傅批中梁振英做特首，但CY屬馬，嚟緊馬年會相冲咁話，叫CY要小心七一遊行同佔中，「會嚴重衝擊佢嘅管治」。至於CY會唔會落台，袁笑住話，「CY有中央撐佢，一定唔會」。 佢話，睇番本書內文，2013年嘅運程預測都「準咗八成半」，又質疑封面「榮登」facebook，係行家有意抹黑咁話，又話之前批中日圓大跌，轉手賺咗3000萬港元云云。 網民質疑違商品說明條例 有網民問2013運程書冇樣講中，會唔會違反商品說明條例，不過Emily見到袁師傳喺書中講：「但願我的預測不準，祈求世界和平。」
|
| |
| |
;){kind=small}
;){kind=small}
