【明報專訊】渣打馬拉松噚日舉行，唔少政界中人亦有參與，身兼南區區議員嘅立法會議員區諾軒，同一班跑手出戰區議會盃10公里賽，最終以52分15秒做出個人最佳時間(Personal Best)，贏得盃賽冠軍。擅跑嘅政制及內地事務局長聶德權參加半馬，以2小時4分鐘完成，連續兩年進步，賽後形容「長路漫漫還是會跑過」，鼓勵吓自己。 聶德權半馬連續兩年進步 聶德權前年半馬跑2小時26分鐘，去年快十幾分鐘，今年以2小時4分鐘完成，進步非常顯著。賽後被記者問到「政改會唔會同長跑一樣」，佢就話大家只要有意願，政府會按《基本法》規定努力去做，強調未放棄政改，政改喺佢「每日嘅工作範圍之中」，但重申要按實際情况推動。 工聯會立法會議員陸頌雄同民建聯議員鄭泳舜都有參與10公里賽，並喺1小時內完賽。陸頌雄笑言對自己仍然跑得感到開心，「跑完感覺輕鬆，係咪未盡全力？」 茂波話邊跑邊接波 點頭唔係同意 噚日渣馬亦舉行2公里嘅「領袖盃」賽事，財政司長陳茂波、全國政協委員霍啟剛同九倉首席顧問吳光正等都有參加。陳茂波致辭時話，跑步係佢鍾意嘅運動，有助保持體格同回復精神，佢講笑話同佢一齊跑嘅領袖選手，可以邊跑邊向佢提出財政預算案建議，不過點頭就唔代表同意，只係跑步無晒氣所以先禮貌點頭回應。唔知司長比賽途中接到咩波呢？
|
| |
| |
;){kind=small}
;){kind=small}
;)
