【明報專訊】噚日係民建聯成立27周年，早前因為擔心有示威者「贈興」，因「安全風險」而取消原定喺9日舉行嘅會慶酒會；民建聯主席李慧琼喺facebook發表民記生日感言，內容提到𠵱家「香港正經歷一浪又一浪的衝突，社會對立，撕裂嚴重」、立法會受到破壞等等。佢話香港法治同社會秩序來之不易，如果任由違法暴力，社會只會沉淪，香港會輸，所有港人都會受害。 話「等睇精彩祝賀」 李慧琼喺fb代民記講生日願望，話民記希望同各界朋友同心協力，為政府改善施政、發展民生經濟，提供最有力嘅支持，理性務實地幫香港走出對立。 民記仲選擇喺fb專頁上面「搞生日會」，話「人數有保證之餘，又唔怕太多人到賀搞到爆場」，仲落埋標籤話「#等睇精彩祝賀 #大家都係年青人」。 究竟留言有幾精彩？呢個生日post上載咗11個鐘嘅時候，已經吸引到2000幾個留言，「贈興」成分相當多，例如有人留言「祝壽終正寢」，又問「點解連生日都唔敢出嚟同市民一齊慶祝？」等。 民記連地區嘅活動都受到影響。fb專頁「禮義廉JetSo」噚日出post，話有市民報料，本身民建聯土瓜灣辦事處會派「少女風推車」，但因為安全理由要取消，感嘆「大批Ann姐(蔣麗芸)同琼子(李慧琼)嘅擁躉大感失望」。
|
| |
| |
;)
