【明報專訊】區議會選舉將會喺11月舉行，唔少正考慮出選嘅人近日相繼開展地區工作。Emily收到風，本身屬於泛民特首選委嘅建築師關兆倫同哥哥中醫師關家倫，有意齊齊出戰區選。關家倫有意披甲出戰黃埔東，同現任黃埔西區議員鄺葆賢，中、西醫拍住上；關兆倫就積極考慮出戰紅磡區，對撼民建聯現任區議員林德成。 關兆倫同Emily講，反修例風波爆發後下定決心，考慮出戰，「見到啲後生，命都唔要，『廢中』好似做到就做啲嘢」。 同屬泛民選委 分戰紅磡黃埔 關兆倫話紅磡區係一個老區，傳統建制有優勢，都幾大挑戰性，但同時區內亦都有唔少重建項目，希望可以喺舊區維修、市區重建呢啲方面幫吓手。 佢透露已經開展地區工作，噚日都有擺街站、宣傳吓，被問到有冇地區工作秘訣，佢話要靠勤力，希望自己嘅技能可以令居民覺得幫到手。 關家倫、關兆倫兩兄弟2016年底分別循中醫界「十三同仁」名單，以及建築、測量、都市規劃及園境界「CoVision16」名單晉身特首選委，唔知兩兄弟今次區議會選舉可唔可以齊齊變身區議員呢？
|
| |
| |
;){kind=small}
;)
