【明報專訊】噚日中秋節，唔覺有秋意，最高氣溫仲高達33℃，天文台話係有紀錄以來最熱嘅中秋，破咗1969年中秋節(9月26日)嘅32.8℃紀錄。 今年熱夜數目同破紀錄 近排天氣熱唔停，天文台星期三朝早11點45分發出嘅酷熱天氣警告，到噚日下午6點先取消，維持咗超過50個鐘頭。天文台話，高空反氣旋正為中國東南部帶來普遍晴朗嘅天氣，同時高溫觸發嘅驟雨正影響廣東內陸。天文台預測，高空反氣旋喺周末同下周初會稍為減弱，屆時會有幾陣驟雨，氣溫都會降番啲。 天文台又話，今年至周三嘅熱夜(28℃或以上)有42日，亦係歷史新高，天文台長岑智明喺facebook留言話「紀錄真係用嚟破嘅」；天文台前台長林超英喺個人網誌「草雲居」話，氣候暖化已經變成氣候災難，佢兒時(1950年代)嘅熱夜一年只得一日，退休(2009年)10年內急升到每年平均28日，最後5年(2014至18年)更飈升到36天，未來升勢恐怕更急，而天文台早前預計，如果全世界繼續現狀，到2050年香港每年熱夜日數會升至接近90日，呼籲市民以行動減少二氧化碳排放，幫地球降降溫。
|
| |
| |
;)
