【明報專訊】民陣原定噚日舉行嘅遊行被警方反對，但仍有唔少市民自發上街。Emily晏晝採訪期間，竟然野生捕獲韓國資深演員金義聖！ 認為警方無攻擊市民嘅話 可能就唔會有暴力 戴住寫有MBC(韓國一電視台)頭盔嘅金義聖，以MBC時事節目主持身分現身金鐘示威現場，用英文回應提問時話親身來港係希望體驗示威真實情况同了解市民真正想法，會盡力訪問最多嘅人。 金義聖喺下晝未發生警民衝突時受訪，形容示威非常和平，喺現場見唔到暴力，認為警方無攻擊市民嘅話，相信可能唔會有暴力出現。佢又話見到好多年輕人為香港自由、自己權利同未來發聲，覺得好感動。Emily現場所見，金義聖亦訪問咗兩個著黑衣示威者𠻹！ 金義聖曾出演人氣電影《屍殺列車》，飾演自私自利嘅商人，佢近月喺Instagram聲援港人，上傳港人遊行照片，亦曾上傳寫有「Stand With Hong Kong 」嘅圖片，上月仲上傳遮掩右眼嘅自拍照，聲援早前參與示威時被射傷眼嘅女子。 以上表態有唔少人大讚，亦引嚟惡意留言，但金義聖無有怕。對於金義聖現身本港街頭，有網民就話Oppa真人堅有型，係真男神喎！
|
| |
| |
;){kind=small}
;)
