【明報專訊】唔少幼稚園最近開始下個學年嘅收生程序，由於近年出生率高番少少，所以學位競爭好激烈，有家長甚至通宵排隊幫仔女攞表報名，都幾誇張。其中灣仔區嘅玫瑰崗幼稚園，唔知係咪唔想家長排得咁辛苦，今年就用「網上預約報名」服務，利用平日賣開演唱會飛嘅「購票通」，畀申請者預約入學申請時段，家長喺網上填資料，再畀30蚊，就可以揀選10月19號去正式交表嘅時段。 交30元 揀選交表時段 相信唔少家長都對可以喺網上預約時段去報名感到高興，做法較方便，但預約後仍有多個程序要做，包括19號去交申請表，之後要排期面試等。根據教育局資料，玫瑰崗幼稚園2013/14學年嘅全日制全年學費3.5萬元，但學校網站就講明，2014/15年度學校就唔可以用學券。 教育界立法會議員葉建源就話，首次聽聞幼園會用購票通系統報名入學，佢認為令家長唔需要排隊都係好事，最好連30蚊手續費都唔使家長畀，因為唔少學校都用電腦方式報名，但就未必係用收費系統，希望校方可以諗埋呢樣。對於𠵱家不時出現拎表報名都排長龍情况，葉建源相信家長都有恐慌心態，而學校亦有營銷策略，但佢覺得其實學位競爭都未去到咁激烈嘅。
|
| |
| |
;){kind=small}
