【明報專訊】勞工及福利局長羅致光曾話香港十年後會迎接「高齡海嘯」，但安老服務供不應求，有公司睇準機會，3年前開設外傭護老課程，噚日就有231名外傭畢業，有自資上堂嘅學員希望憑住所學，照顧好僱主之餘可獲加薪機會。 活力國際專業護理有限公司舉辦嘅護理課程，程度等同菲律賓國家二級證書嘅護理資歷，16堂課內容包括心肺復蘇法、護理、扶抱、餵食等，收費2200元。公司經理趙國棟話，現時僱主對中風後嘅臥牀護理需求較大，如胃管餵飼呢類家人無時間或唔夠膽處理嘅醫護程序，故有護理經驗嘅外傭月薪平均可達5700元。 有護理經驗 月薪平均達5700元 39歲嘅Girly 9個月前來港，獲聘照顧68歲、患有認知障礙同糖尿病嘅伯伯，佢話有時唔太知老人家諗咩，但透過課程學識咗要有耐性，仲有注射胰島素、「篤手指」驗血糖等醫護技巧。佢現時月薪4460元，希望學成可以加薪500元。另一學員Anton嘅僱主76歲，自從佢上堂後，伯伯都會請佢幫手辨識藥物。
|
| |
| |
