【明報專訊】立法會保安事務委員會噚日繼續開會討論《逃犯條例》修訂，公民黨譚文豪引述保安局長李家超曾經話，若修例通過後內地違反移交協議嘅人權保障，內地有「第四權」，傳媒會監察，會畀壓力政府；譚就舉例，有關六四嘅新聞喺內地媒體同網頁「被消失」，反問李家超點解覺得內地有第四權監察政府。建制派何君堯其後幫口，唔知係咪針對譚文豪飛機師嘅身分，以飛機喻傳媒，「你喺中國外揸嘅747，內地都有，你唔可以話出面嘅就係飛機，飛入去(大陸)嘅就唔係；只不過有時你飛得高啲低啲，內地不斷進步」。 何君堯又話，第四權喺共產國家一樣有，只係程度問題，又話譚文豪嘅「宗主國」美國都唔係無限包容。譚文豪就反駁，從來無講過自己宗主國係美國，要求何君堯收番有關言論。民主黨林卓廷就提出問題，提醒何議員，譚文豪作為直選議員係唔可以有外國國籍嘅。 李家超覺內地有第四權 因常見新聞發布會 至於李家超對於新聞第四權嘅睇法，佢話「全世界都有第四權，第四權係新聞報道對事實嘅睇法，呢個係新聞工作者嘅責任，每個地方新聞工作者都有佢嘅新聞專業去報道事實」。至於佢點解覺得內地有第四權？李家超話因為經常睇到內地有新聞發布會。
|
| |
| |
;)
