【明報專訊】啟業運動場喺1980年代初建成，舊年翻新咗，創新之餘又保留經典設計，其中好搞鬼嘅係回收桶變身籃球架，每次回收膠樽都名正言順「入樽」。 回收桶變籃球框形狀 九龍灣啟業邨停車場頂樓嘅啟業運動場佔地2萬平方呎，基匯資本舊年11月展開翻新工程，聘用街頭籃球文化組織SLAB，同埋本地設計工作室One Bite Social參與設計，過程中考慮咗運動場用家嘅實際需要。 唔少人去打波都會飲樽裝水，飲完個樽隨手丟入垃圾桶。為咗環保啲，設計師將啡色膠樽回收桶改頭換面，變成籃球框形狀，畀波友為環保「入樽」。基匯資本公共事務及市場總監黃梓謙話，自1月26日運動場開幕以來，已收集到近1萬個膠樽，交咗畀環保組織「綠領行動」。 運動場入口附近，有3個籃筐垂直鑲咗喺牆，最高一個離地約4米。點先射到籃？ SLAB創辦人葉嘉華話：「我喺設計時，無訂一個特定嘅玩法。」佢話設計呢個藝術裝置時，係受李小龍名言「以無法為有法」啟發，希望突顯自由、隨性嘅街頭文化，鼓勵大家自創玩法。 運動場獲城市土地學會頒發亞太區卓越獎，表揚佢嘅獨特建築設計，其他獲獎項目包括金鐘太古廣場。
|
| |
| |
;){kind=small}
;)
