【明報專訊】港大民研自從搞咗網上投票平台後，收到唔少市民提供調查題目，港大民研特登設立「PopCon普及民意平台」蒐集市民嘅題目。Emily噚日望吓市民建議嘅題目，發現港人創意果然非凡，當中有人建議調查「應否將佔中者送去堆填區」，而建議答案只有一項—「應該」。 普及民意平台上周起開始蒐集建議題目，大都同佔中及政改有關。有市民透過平台召喚民研總監鍾庭耀，問佢點解喺佔中後失蹤，仲叫佢快啲調查佔中對市民影響。 挑選過程謹慎 有市民就建議民研做「佔領運動對消費的影響」、「佔中應否繼續」、「你對人大決定的滿意程度」等問題。不過，亦有人建議做「應否將佔中者送去堆填區」，同埋「應否將佔中三子薪水全部賠償受阻商戶」等問題。不過，暫時未有任何題目中選，Emily聽聞，港大民研選定題目嘅程序好謹慎，選定題目後，要先得到大學「道德評估」(ethical review)後至可以做調查。
|
| |
| |
