過度進取 打倒自己
鶴臣如病態賭徒
Two-Face，不一定是Harvey Dent，原來鶴臣都得。唔好意思，又寫英格蘭，但係鶴臣確實令柏高覺得，好難捉摸呀！反勝威爾斯之役，上半場是保守頑固到一個點的鶴臣，下半場是開放拚死到一個點的鶴臣，戰術大師？咪玩啦，病態賭徒可能較貼切。
轉踢4-4-2攻守更平衡
2年前世界盃，柏高一再點出鶴臣的賭仔本質，如今又得到重複印證。經過首戰失分，仍維持正選陣容不變，甚至戰術亦大同小異，明知不可為而為之，那是賭氣，也切合鶴臣一貫頑固地異常信任用開的11人。史達寧在final third的判斷力和臨門把握力差勁講足幾年，用他的主要目的是攻擊威爾斯翼衛身後的空位，可是威爾斯擺明縮後打反擊，亦即是那個空位基本上從不存在，「250」殘餘唯一作用便是浪費機會。
哈利卡尼終於不用開角球，但不太擅長走盲眼位的他，正面硬撼的中堅人數由2個增至3個，迪利阿里及朗尼又為了防範快攻而不敢插上支援，卡尼注定被玩笑，英軍注定冇入波。
不過又真係估鶴臣唔到，更衣室出嚟立即齊換占美華迪及史杜列治；末段換埋拉舒福特入嚟，更是不必要的盡地一煲，進取得過了火位。在最後幾場熱身賽開始，鶴臣一直堅拒打雙箭頭和鑽石形中場，又話要平衡攻守又乜乜乜，但一用華迪與史杜，名義上依然4-3-3，運作上不正是4-4-2 diamond嗎？華Dee最前走盲眼位牽制3名中堅，稍後的史杜忽右忽左呼應，阿里做鑽石頭走進華Dee製造的空位；以朗尼為首的中前場眾將變得敢於直接傳球進危險地帶，毋懼誤傳失去控球權，藉着全體壓迫線推得更前，使威爾斯中後場再無時間空間瞄準加里夫巴利送出長傳，有何不平衡？
想法不明不白難捉摸
現在剩下的問題為，最後一場分組賽出乜人？正路是華迪、史杜和卡尼3揀2，然而根據模擬運算，4分和得球失差+1是100％起碼以最佳第3名出線，何况鶴臣大抵也不在乎首名或次名晉級。柏高對鶴臣的想法不明不白，鶴臣自己何嘗不會為選擇Two-Face的哪一面而搲頭？
