【明報專訊】建制的45分鐘與15分鐘 立法會今個星期議程包括修改《議事規則》建議，大戰前夕，建制派未敢鬆懈，噚日繼續實行大家坐定定喺會議廳45分鐘，再集體小休15分鐘，確保唔會因為會議廳內唔夠人，不停點人數令會議被拖延。唔少建制派為咗慳時間，只係選擇輕食，叫助理幫手買外賣，趁小休時喺會議廳前廳快快食完填肚，好似「副班長」民建聯陳克勤，就叫助理幫佢買飯糰等，Emily見佢喺前廳一路快食一路低頭睇嘢，10分鐘食完又要行返入會議廳。 除咗克勤，工業(第二)議員吳永嘉亦叫助理幫手買兩份三文治做午餐，畀佢同好友、新民黨容海恩可以把握時間食完；而工聯會陸頌雄就叫助理買飯盒，同樣15分鐘內食完再開會。 慢必花160元後呻笨 至於泛民主派又點樣應付議事規則攻防戰呢？走抗爭路線嘅人民力量陳志全(慢必)，噚日就特登去立法會紀念品售賣部，買咗本《議事規則》。佢話買嚟打算進入辯論時，逐頁逐頁撕爛掟出去或者食落肚，但買完之後就呻笨喇，慢必話因為建制派若成功修改議事規則，呢本《議事規則》亦作廢，需要更新，其實佢大可以用辦事處本《議事規則》去抗爭，唔使特登花160元買多本喎。
|
| |
| |
;){kind=small}
;){kind=small}
;)
