【明報專訊】「幫港出聲」發起人之一周融本業係公關人，亦做過港台主持，近日同樣開公關公司嘅馮煒光，被傳會做政府新聞統籌專員，唔知周融點睇？周融話喎，「一個願請、一個願做」，有咩問題？佢話專員呢個位由記者做，一定有啲「着數」，但就覺得專員好似守門員，搵前鋒做未必好，仲話好記者唔一定係一個好公關𠻹。 被問到馮煒光搞藝發局選舉都搞到一鑊粥，曾經失落港台台長一職嘅周融就話，佢唔識馮煒光，所以好難評論。不過，原來周融就識咗啱啱走嘅專員鄧惠鈞(June)好多年，咁周融會唔會覺得馮煒光資歷畀阿June淺好多呢？ 周融就同Emily講古仔，話佢後生時入咗《英文星報》3年，廿歲唔夠就升做採訪主任。佢話啱啱升嗰陣，唔少外國人同資歷深嘅人都唔係好服佢，後來老細同佢講因為佢有好多唔同嘅solid experience(紮實嘅經驗)，所以先升佢！原來老細喺升佢之前，調咗佢去做娛樂版記者，增加經歷！
|
| |
| |
