【明報專訊】由泛民議員組成嘅「飯盒會」將會喺今個星期五復會，今屆輪到泛民「散人派」代表嘅民協馮檢基做召集人。阿基噚日好認真咁搞個傳媒茶敘，宣布呢個消息，不過阿基話，推舉召集人當日佢無去開會，所以唔知點解自己會被推舉，仲笑笑口話可能自己係超級區議員，有26萬票民意支持喎。 日本見毓民 政改有偈傾 佔領中環第二輪商討日將會討論應以電子投票或是由議員辭職啟動補選，決定特首普選方案，唔知呢名飯盒會召集人會唔會身先士卒呢？阿基就話，如果議員辭職係民意所向，咁3個泛民超級議員，即阿基、涂謹申、何俊仁都有責任辭職，至於人選就要大家傾吓喇。阿基仲話，飯盒會眼前最緊要就係傾掂下屆會期各委員會嘅主席人選，但未來最重要係喺政改問題上團結泛民27票，包括唔屬飯盒會嘅泛民議員，佢仲話前排喺日本都有接觸過普羅政治學院黃毓民，對方都話可以傾吓。
|
| |
| |
