【明報專訊】區議員不時搞旅行團帶街坊去玩，新民主同盟北區區議員陳惠達噚日帶成班街坊去港珠澳大橋、澳門一日遊，仲話今年暑假無去旅行，諗住帶埋阿仔去陪番佢一日，點知澳門唔畀佢入境。陳惠達喺fb上載被拒入境通知書，澳門當局話「有強烈迹象」顯示佢企圖入境澳門從事危害公共安全或秩序嘅活動。去唔成旅行團，陳惠達隨即去咗機場，出席「和你飛」集會。 帶街坊去港珠澳橋澳門一日遊 陳惠達話，懷疑被拒入境係同特首林鄭月娥今日會去澳門出席粵港澳大灣區發展建設的文化使命國際論壇開幕儀式有關。佢話當時喺港珠澳大橋出入境大堂，以e道過關但唔成功，及後有職員帶佢去旅客辦理簽證嘅房間，先後要求佢填寫個人資料、到訪目的同旅程資料，「說要讓情報科查看」，約1小時後獲發還身分證，並收到拒絕入境通知書。陳惠達話，以往有黨員被拒入境澳門，佢唔會向澳門當局索取回應。 佢喺fb簡單講述事件時形容，澳門就係與別不同，質疑「帶街坊」點樣危害公共秩序？及後佢轉戰機場「和你飛」集會並上載相片，有網民留言話佢「抵死」，陳惠達就回覆：「唔係吖，幾好呀！多個人嚟機場默坐。多謝澳門入境部門撐我返嚟繼續抗爭。」
|
| |
| |
;){kind=small}
;)
