【明報專訊】商務及經濟發展局前局長馬時亨(肥馬)噚日以首席評判身分，出席十大傑青頒獎禮，佢致辭時仲將特首梁振英(CY)同行政會議處理發牌事件拿來開玩笑，幽默一番。佢話自己好似陪審團咁引導評判，再加上一籃子因素去決定揀選傑青，「我肯定無最終決定權」，引起哄堂大笑。同場嘅行會召集人林煥光講笑都唔弱，佢亦話評審公平公正，因為傑青曾經選出CY，同埋2017年好大機會出嚟選特首嘅華仔(劉德華)！ 自喻陪審團「無最終決定權」 肥馬致辭時第一句已經「有骨」，話「喺不違反保密原則下」，同大家透露吓傑青評審準則。佢話一眾評判「日以繼夜，夜以繼日」做評審嘅工作，強調絕無「泄密」，席上所有討論都唔會公開。佢又引用CY嘅「陪審團論」，話自己喺評審工作上無最終決定權。 林煥光：評審團功力深厚選CY 喺電視發牌事件上曾叫CY「深切檢討」發牌過程嘅林煥光，喺頒獎禮中一邊聽一邊抹眼鏡，到佢上台時亦不甘示弱「反擊」，話評審團功力十分深厚，因為曾經選咗CY、奧運金牌得主李麗珊同華仔做傑青。雖然肥馬退出官場多年，但Emily睇得出佢仲好留意香港政府嘅近况，唔知將來佢有無機會重出江湖呢？
|
| |
| |
;){kind=small}
