【明報專訊】有「香江第一健筆」之稱嘅《信報》創辦人林行止(圖)最近獲《健力士世界紀錄》確認為The Longest serving daily newspaper columnist，即係「全球連續撰稿時間最長嘅報章專欄作家」。林行止由1973年至今，筆耕不輟，起碼寫咗1.1萬篇專欄，合共超過2000萬字。 資料顯示，對上一個持有呢項紀錄嘅係日本小說家兼隨筆作家五木寬之，佢連續32年220日撰寫專欄。而林行止由1973年起計，截至今年2月底，獲健力士確認為連續45年240日撰寫專欄，而且淨係計咗佢用「林行止」呢個筆名寫嘅文章，未計「史威德」等其餘筆名。 林：勤工獎，一於笑納！ 《信報》噚日一個專欄提到，健力士3月已經接納呢個世界紀錄，不過快將80歲嘅林行止早前抱恙，做咗兩個手術，日前先出院。佢家人上周六(8月31日)幫佢搞咗個驚喜派對，仲請咗健力士公司代表親手頒發獎狀，林行止當刻先知自己成為世界紀錄保持者；專欄引述林行止對此非常高興，並表示：「這是我的勤工獎，受之無愧，一於笑納！」
|
| |
| |
;){kind=small}
;)
