【明報專訊】噚日資深傳媒人區家麟喺「主場新聞」寫咗篇中大校長沈祖堯訪問，提到沈校長喺中大廣受歡迎，甚至喺50周年晚會「百萬零一夜」嗰晚，隱約聽到有人大叫「祖堯BB」，挾住沈校長人氣，呢篇訪問噚日截至8點已經喺facebook有409個人分享出去。 篇訪問都係講沈校長嘅人生道理，話﹕「人生很短暫，生離死別無可避免，短短的人生裡，應做些可以留得低的事。」錢未必留得低，但教育一代、寫一本書等都係留得低嘅。 講老生常談 驚訝多人分享 沈校長又講咗3個老生常談﹕唔好用錢衡量成就；唔應該太重視大學排名；要改變家長心態。佢希望大學唔會搞量化評核，等學者有空間做長遠嘢，唔使做論文交數。雖然老生常談，但都有唔少人分享沈校長嘅講話，沈校長喺訪問都話好驚訝，可能呢個世界好少人講呢啲嘢，大家都講投資買樓。 沈校長喺訪問中話自己最近學緊書法，點解呢？佢話因為以前返內地交流，人哋畀支毛筆佢題字，佢即刻啞咗，好尷尬。 不過，中大畢業生、社運人士陳倩瑩睇完區家麟篇訪問後，忍唔住喺「主場新聞」寫咗篇文，叫〈致沈祖堯校長﹕坐言起行，取消量化評核〉，話沈校長都做咗3年幾，仍然畀中大繼續採用重視發表論文數量嘅量化評核，只能夠對外講漂亮說話換取大眾掌聲，但又容忍中大炒走量化評核唔及格嘅好教師，所以希望沈校長坐言起行。
|
| |
| |
