【明報專訊】十幾人噚日朝早去到九龍塘廣播道嘅香港電台電視大廈門外請願，卻拉起寫上「強烈譴責商業電台立場偏頗」嘅橫額，喊口號時就叫「嚴厲譴責香港電台」，似乎搞唔清請願對象咁。商台節目《在晴朗的一天出發》噚日就喺 facebook專頁提出質疑：「霞姨，呢班咩人嚟架？」暗批呢班人係臨時演員。 《晴朗》：霞姨，咩人嚟？ 《在晴朗的一天出發》喺fb專頁上載短片，顯示有十幾個請願者喺港台電視大廈門外，拉起抗議商台嘅橫額，但喊口號時又叫「香港電台，歪曲事實」、「支持警察，嚴正執法」。專頁形容請願者「拎住譴責商台banner企喺港台門口抗議！聽埋佢哋嗌口號，真係抓晒頭」。專頁其後再上載相片，話請願者午飯後再到現場舉牌抗議，終於搵啱門口，但標語牌卻寫上「立場與民為敵 煞停香港電台」，錯完再錯。 而今日就將有聲稱組成「媒體報導關注組」嘅市民，一次過批評兩台近月報道偏頗，會去到港台同商台外抗議，要求佢哋公平、公正報道事實。
|
| |
| |
;){kind=small}
;)
