【明報專訊】近年立法會每逢有重大法案或議題要討論同投票時，政府都會派公職人員包括AO及EO(政務主任及行政主任)，喺立法會大樓嘅通道同出入口駐守，仲要成日「傍住」議員出入，議員去廁所都要留意，確保佢哋有投票、「無走佬」。不過，有議員就睇唔過眼，街工議員梁耀忠噚日喺立法會大會就質詢公務員事務局長鄧國威，問點解會有咁嘅安排；公民黨陳家洛都質疑局方，有無問過人哋想唔想做啲咁無意義嘅工作。 AO被譽為公務員嘅天之驕子，年年有逾萬名大學生申請爭位，但到頭來要經歷做狗仔隊。不過，鄧國威強調，呢個做法絕對無浪費公帑同人才，因為公職人員要為司局長提供立法會投票嘅第一手資料，仲要向議員游說同解釋政策，呢個係佢哋嘅職責，所以喺立會駐守一啲都唔出奇。 鄧國威：絕無浪費公帑人才 不過，泛民議員就唔多滿意局長嘅解釋，仲質疑公職人員只係監視建制議員嘅投票取向。公民黨郭家麒就好認真咁問﹕「政府會唔會安排狗仔特訓班或者去娛樂新聞組學做狗仔隊？」
|
| |
| |
