【明報專訊】復辦後第三屆維港渡海泳噚日舉行，本來有6個立法會議員報名參加優悠組，最後得「體育、演藝、文化及出版界」馬逢國、會計界梁繼昌同紡織及製衣界鍾國斌通過水試，可以正式參賽，民主黨胡志偉就獲邀做下水禮嘉賓。點知馬逢國出師不利，一起步就畀其他參加者踢中手骱，游完300米就決定退出比賽。但馬逢國話無失望，因為始終唔想博，希望下年可以再戰。梁繼昌同鍾國斌都順利完成賽事，時間分別為40分鐘及38分鐘；至於男子公開甲組冠軍成績係18分44.1秒！ 只可游300米 胡游畢全程 相反，作為嘉賓嘅胡志偉就游足1500米全程。本來大會話當佢游過300米就會叫番佢上水，佢就話游游吓見到自己都唔係包尾，相信有能力完成賽事，雖然中途有大會人員大叫「146(胡的編號)上水啦！」，佢都扮聽唔到衝去終點，以非正式參賽者「違規」完成賽事。 政制及內地事務局政治助理陳岳鵬(Ronald)都有參賽，佢話雖然無游渡海泳經驗，但一早請教咗有經驗人士，如果唔想會畀人踩同批踭，最緊要靠邊游，於是Ronald好快就游到中途站，點知一嘟完條碼登記以示到站，大浪就到，搞到佢游嚟游去都未到終點！咁結果佢游咗幾耐？Ronald話唔知，原因係佢無帶表落水，而佢亦要喺岸上排咗近半個鐘先落到水，所以可能連大會都未必知佢幾點落水。不過，游優悠組都係志在參與啫。
|
| |
| |
;){kind=small}
;){kind=small}
