【明報專訊】農曆新年假期唔少人都外遊叉電，鍾情潛水及大自然嘅立法會議員葛珮帆(EQ)，就去咗馬爾代夫玩潛水攝影。EQ本身係潛水教練，又曾經喺南極冰潛，但佢話由於工作忙，已經有3年幾無出海潛水，仲話佢套水底攝影器材都係時候要用吓，否則器材就夠鐘退役！ 馬爾代夫水清沙幼，對EQ當然無難度，佢話今次喺海中就同一隻大海龜邂逅。EQ喺20米水深遇到呢隻大海龜，海龜不但無游走，仲迎面游過嚟，停喺EQ前面不特止，又用尖嘴「敲敲」EQ嘅相機鏡頭，八卦完一輪先游走。EQ話當時好興奮，本能反應下按下快門，影到海龜親吻鏡頭嘅一剎那(圖)。 EQ話以前水底有好多海龜，但由於近年被人過分捕殺，又有好多海龜誤食廢棄膠袋或者被廢棄魚網纏死，令數量大跌，有啲品種好似綠海龜更已瀕危，所以喺大海中遇到海龜已經愈來愈唔容易。EQ呼籲大家真係唔好再污染海洋，以免禍及野生動物。 (葛珮帆提供)
|
| |
| |
;){kind=small}
