【明報專訊】民建聯立法會議員葛珮帆(EQ)同埋何俊賢(高佬)，上周六帶記者到流浮山做團拜，請食本地有機菜及綠色海鮮養殖場嘅龍躉。高佬作為漁護界代表，希望身體力行，推介可持續嘅環保養魚同有機種植技術喎。 推有機種植環保養魚 佢哋帶記者走訪魚場及有機農場，EQ係素食者，但都話支持本地漁農業，話咁就可以避免出海捕魚越洋運送，減少碳排放。佢又推介獲得世界自然基金會認證嘅綠色海鮮養殖場，話可以有多一個選擇，避免過度捕撈而令龍躉變成瀕危物種。佢哋今次參觀嘅魚場，就有同香港大學合作，應用科研成果改進養魚技術，又配以太陽能設施，每年省電14萬度，相等於75噸碳排放，佔總用電量15％至20％。 高佬仲請大家食唔同顏色嘅有機番茄，包括黑色番茄、奶嘴番茄，乘機叫政府長遠應善用荒廢農地或合適土地，將農業重新整合發展。特首梁振英咁重視漁農界選委嗰60票，相信都應該收到高佬嘅要求啦！
|
| |
| |
;){kind=small}
