【明報專訊】浸大學生會會長方仲賢月初因購買雷射筆被捕，其後獲釋，上星期喺記者會交代被捕過程，其間以英文回答提問；活躍網絡世界嘅前特首梁振英(CY)前晚喺facebook出帖質疑方仲賢嘅英語水平，話佢與其買「雷射槍」，「不如專心學習，首先要惡補英文」。方仲賢發帖反諷話，對方收咗UGL 5000萬元，「資助小弟五百蚊去補英文都唔過份吖」。 CY喺帖文形容方仲賢英語水平「太恐怖了」，叫浸大校長錢大康交代：「方同學是怎樣考入浸會大學的？他的成績可以公開嗎？貴校其他同學的英語也是這樣恐怖的嗎？」方仲賢之後轉載CY帖文反諷，並主動私訊CY，問對方「係咪英文勁先可以收到5000萬？」，並截圖同網民分享，話「梁領導好似有發達大計，ICAC廉政公署幫手Share？」 CY質疑方仲賢英語水平，隨即被翻舊帳，話佢2016年就橫洲公屋發展風波開記者會時，曾將「三司會」(高官恒常會議)譯成「Three C meeting」。
|
| |
| |
;)
